عاجل

اخبار الثقافة الان ... كلّنا ف ضهرك يا مصر

0 تعليق 2 ارسل لصديق نسخة للطباعة تبليغ

اشترك لتصلك أهم الأخبار

كلنا ف ضهرك يا مصر

ادخلى بصدرك ولا يهمّك أعادى

كلّنا ع الجبهه وبنهتف بلادى

كلّنا رصاص ف البنادق والأيادى

طلق طالع للسما ونازل بنصر

■■■

العساكر ورد بينبّت فى سينا

والنهار فى الضلمه طالع من إيدينا

والغنا ف وقت الحماس بيدبّ فينا

إحنا رمل الأرض وجمال الصحارى

والمحبّه ف قاعدة الناس فى العصارى

والدعاوى الطارحه فى الطين والقصارى

باختصار إحنا اللى جبنا النيل وجينا

■■■

يا أمل فى وشوش بيضحك للمغارب

القلوب الطاهره وقت الشدّه قارب

والدموع المخلصه فرحة محارب

راح هناك علشان يكون أحمد ومينا

■■■

يا وطن ومواطْنَة والواطى يقاضينا

لو وقفنا ف يوم فى وشّ اللى معادينا

أو رسمنا نهار على أوّل وادينا

أو شرب أعادينا يوم «كدرًا وطينا»

■■■

قولوا تحيا بلادنا فى وشوشهم وتحيا

مصر صوت الحق دايمًا بينا صاحية

واللى جاى من أى حتّه وأيّ ناحية

هيلاقيها بتبتسم وشّ وسارينة

■■■

يا انتظار الحقّ يرجع للغلابة

يا زمالة الدّوشمة والليل والرحابة

يا العيون الصاحية يا صُحْبة وصحابة

التراب المصرى قايد نور عنينا

■■■

حرب والموضوع ماهوش عايز محايدة

واللى نفسه يكيد ماهوش وقت المكايدة

لما ييجوا ولادنا بكروت المعايدة

يبقى عادت مصر بقلوبنا الرهينة

■■■

اجمدوا بسلاحها واتوضّوا بضحاها

واصمدوا والدنيا بتلفّ ف رحاها

مصر جاية وشايلة راس أشرس عداها

واللى يتجرّأ يقيس القوّة بينا

■■■

كلّنا ف ضهرك إذا نادى المنادى

ادخلى بصدرك ولا يهمّك أعادى

كلّنا رصاص ف البنادق والأيادى

طلق طالع للسما وشايل كتابها

شعر: سعيد شحاتة

------------------------
الخبر : اخبار الثقافة الان ... كلّنا ف ضهرك يا مصر .. تخلي صحيفة الاجيال الحرة مسئوليتها الكاملة عن محتوي هذا الخبر وانما تقع المسئولية علي الناشر الاصلي للخبر و المصدر هنا : المصرى اليوم

أخبار ذات صلة

0 تعليق