اخبار الثقافة الان ... لحظة صمت

0 تعليق 3 ارسل لصديق نسخة للطباعة تبليغ

اشترك لتصلك أهم الأخبار

ريشة الفنان: حلمى التونى

ف لحظة صمت..

بتدِّى للسان هدنة!!

وتدِّى العقل فرصة يراجع الأفكار

وتكسر حِدة الرغى اللى صدّعنا

وضيّعنا.. وتوّهنا عن المشوار

ف لحظة صمت..

فيها الصمت يتكلم

وأعلِّم قلبى يسمع صوت

ماهوش صوتى

يجوز إنى ألاقى الحكمة ف سكوتى

وألاقى طريق يخرّجنى من المتاهات

بشوف الشمس بتنور

وبتروّح كمان ف سُكات

ف لحظة صمت يمكن تسمعى منى

كلام ماقدرتش إنى أقوله بلسانى!!

يا سَايبانى ف بحر كلام.. أتوه وأحتار

ف لحظة صمت.. يمكن لو ملكناها

نلاقى الصدق جوّاها

ونلقى لبعضنا الأعذار

ويمكن بعدها نقدر نصالح عمرنا الآتى

رغينا كتييييير.. وعيشنا العمر بنهاتى

وأتارى إن الكلام أصبح كلام ببلاش

وأتارى الرغى بيعلِّى ما بينّا جدار

أنا محتاج للحظة صمت

نويت إنى مافوّتهاش

أعيشها بجد مش بهزار

ويمكن بعدها أختار

أقول نُكتة.. أقول حكمة

وجايز أكتب الأشعار

------------------------
الخبر : اخبار الثقافة الان ... لحظة صمت .. تخلي صحيفة الاجيال الحرة مسئوليتها الكاملة عن محتوي هذا الخبر وانما تقع المسئولية علي الناشر الاصلي للخبر و المصدر هنا : المصرى اليوم

أخبار ذات صلة

0 تعليق